जनक थापा, नेपालगञ्ज
नेपालगञ्ज — Nepalgunj Bahumukhi Campus ले नयाँ शैक्षिक सत्रको अवसर पारेर विद्यार्थीहरूका लागि भव्य “Welcome & Farewell Program–2083” आयोजना गर्ने भएको छ। कार्यक्रम यही वैशाख २६ गते बिहान १०:०० बजे Hotel Siddhartha View मा सम्पन्न भएको आयोजकले जानकारी दिएको छ।
क्याम्पसले आयोजना गर्न लागेको उक्त कार्यक्रम नयाँ विद्यार्थीहरूलाई आत्मीय स्वागत गर्दै पुराना तथा स्नातक तह पूरा गर्न लागेका विद्यार्थीहरूलाई सम्मानपूर्वक विदाइ गर्ने उद्देश्यले गर्न लागिएको हो। हरेक वर्षझैँ यस वर्ष पनि कार्यक्रमलाई विशेष र स्मरणीय बनाउने तयारी तीव्र रूपमा भइरहेको जनाइएको छ।
कार्यक्रममा क्याम्पस प्रमुख, प्राध्यापक, कर्मचारी, विभिन्न संकायका विद्यार्थी तथा अतिथिहरूको उल्लेखनीय सहभागिता रहने अपेक्षा गरिएको छ। विद्यार्थीहरूबीच आपसी सम्बन्ध सुदृढ बनाउने, नयाँ वातावरणसँग घुलमिल गराउने तथा अध्ययनसँगै अतिरिक्त क्रियाकलापमा प्रेरित गर्ने उद्देश्यले कार्यक्रम आयोजना गर्न लागिएको आयोजक समितिले जनाएको छ।
कार्यक्रम अन्तर्गत स्वागत मन्तव्य, प्रेरणादायी सम्बोधन, विद्यार्थी सम्मान, सांस्कृतिक प्रस्तुति, नृत्य, गीत-संगीत तथा मनोरञ्जनात्मक गतिविधिहरू समावेश गरिनेछन्। विशेषगरी अन्तिम वर्षका विद्यार्थीहरूको क्याम्पस यात्रालाई सम्झनायोग्य बनाउन विभिन्न सम्मान तथा मायाको चिनो प्रदान गरिने तयारी गरिएको छ।
विदाइ हुन लागेका विद्यार्थीहरूले क्याम्पसमा बिताएका अविस्मरणीय क्षणहरू स्मरण गर्दै नयाँ यात्राका लागि शुभकामना आदानप्रदान गर्नेछन् भने नयाँ विद्यार्थीहरूका लागि यो कार्यक्रम क्याम्पस जीवनको पहिलो विशेष अनुभव बन्ने विश्वास गरिएको छ।
“Let’s celebrate memories & new beginnings” भन्ने मूल नारासहित आयोजना हुन लागेको उक्त कार्यक्रमले विद्यार्थीहरूबीच मित्रता, सहकार्य र आत्मीयता अझ मजबुत बनाउने विश्वास क्याम्पस प्रशासनले लिएको छ।
कार्यक्रम सफल बनाउन विद्यार्थी संगठन, स्वयंसेवक टोली तथा व्यवस्थापन समितिले आवश्यक तयारीलाई अन्तिम चरणमा पुर्याएको जनाएको छ। साथै, कार्यक्रममा सहभागी भई कार्यक्रमलाई सभ्य र भव्य बनाउन सम्पूर्ण विद्यार्थीहरूलाई अनुरोध समेत गरिएको छ।
Post a Comment