नेपालगंज बाँके
नेपालको राजनीतिक इतिहासमा एउटा नयाँ अध्याय थप्दै नवनिर्वाचित प्रधानमन्त्री बालेन्द्र (बालेन) शाहले आगामी शुक्रबार शपथ ग्रहण गर्ने हुनुभएको छ। राष्ट्रपति कार्यालयका अनुसार शाहको शपथ ग्रहणका लागि दिउँसो १२:३४ बजेको शुभ समय तय गरिएको छ।
भर्खरै सम्पन्न आम निर्वाचनमा ऐतिहासिक सफलता हासिल गरेपछि बालेन शाहले मुलुकको कार्यकारी प्रमुखको जिम्मेवारी सम्हाल्न लाग्नुभएको हो। राष्ट्रपतिको सचिवालयलाई सोही समयअनुसार कार्यक्रमको व्यवस्थापन गर्न औपचारिक जानकारी पठाइसकिएको छ।
यस पटकको शपथ ग्रहण समारोह विगतका तुलनामा निकै भिन्न र सांस्कृतिक रूपमा विशेष हुने देखिएको छ। समारोहलाई मौलिक र आध्यात्मिक बनाउन व्यापक तयारी गरिएको छ
समारोहमा १०८ जना बटुकहरूले सामूहिक रूपमा वैदिक मन्त्रोच्चारण गरी विशेष माहोल सिर्जना गर्नेछन्।
शान्ति र सद्भावका लागि १०७ जना बौद्ध लामाहरूले 'मंगलकामना' पाठ गरी नयाँ सरकारको सफल कार्यकालको कामना गर्ने योजना छ।
कार्यक्रमको सुरुवातमै सात जना ब्राह्मणहरूले शंख ध्वनि बजाएर समारोहलाई परम्परागत र मांगलिक शैलीमा अगाडि बढाउनेछन्।
काठमाडौंको मेयर हुँदै राष्ट्रिय राजनीतिमा उदाएका शाहले आफ्नो शपथ ग्रहणलाई केवल प्रशासनिक औपचारिकतामा मात्र सीमित नगरी नेपालको बहुधार्मिक र बहुसांस्कृतिक पहिचान झल्काउने प्रयास गर्नुभएको छ। यसलाई धेरैले नेपालको मौलिकता र धर्म-संस्कृतिको जगेर्ना गर्ने एउटा सांकेतिक कदमका रूपमा लिएका छन्।
राष्ट्रपति भवन शीतल निवासमा आयोजना हुने यस विशेष समारोहमा विभिन्न देशका कूटनीतिक प्रतिनिधि, राजनीतिक दलका नेता तथा विशिष्ट व्यक्तित्वहरूको उपस्थिति रहनेछ।
Post a Comment